புல்லாணிப்பக்கங்கள்: ஒண்ணுமில்லே

ஒண்ணுமில்லே லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

செவ்வாய், 19 நவம்பர், 2019

Enjoyable Audios

In 2015 links to audios of upanyasams by various luminaries were shared in a Google group “Amirtha vahini”. Surprisingly majority of the links still open easily and the audios can be downloaded. Interested may visit and download.

Please do not waste your time on links at Esnips and sangeethamshare as they are now not working.

Bhagavad Gita with Tamil translation
*

http://rapidshare.com/files/86389517/BahagavatGita_with_Tamil_Translation_Ch1_and2.zip.html
http://rapidshare.com/files/86470138/BahagavatGita_with_Tamil_Translation_Ch3_5.zip.html
http://rapidshare.com/files/86474288/BahagavatGita_with_Tamil_Translation_Ch6_9.zip.html
http://rapidshare.com/files/86655439/BahagavatGita_with_Tamil_Translation_Ch10_12.zip.html
http://rapidshare.com/files/86760051/BahagavatGita_with_Tamil_Translation_Ch13_16.zip.html
http://rapidshare.com/files/86853064/BahagavatGita_with_Tamil_Translation_Ch17_18.zip.html

*Brahmasri Nochur Venkataraman -Srimad Bhagavatham*

<http://www.mediafire.com/?sharekey=c4d5a2e33be912c34012e8015643d9c8c2de4cdbd9df2f1b>

http://www.mediafire.com/?a32dh01bthj<http://www.mediafire.com/?a32dh01bthj>

வியாழன், 25 பிப்ரவரி, 2016

சந்தோஷம்

ரொம்பவே சந்தோஷமா இந்தப் பதிவை இடுகிறேன். சந்தோஷம்? நவம்பர் 15ம் தேதி தொலைத்த -- இல்லை இல்லை திருடு போன --போனை இன்று கைப்பற்றினால் சந்தோஷம் வராதா என்ன? காணாமல் போன InFocus M2 Mobile போனை ஜூலையில் வாங்கியிருந்தேன். மிக நன்றாக இருந்த அந்த போனை நவம்பர் 15ல் பறிகொடுத்த பிறகு, சில நாள்கள் தேடிக் கிடைக்காமல், ஒரு மாதம் போல ஒரு பேஸிக் போனை உபயோகப் படுத்தி அதன்பின் டிசம்பர் கடைசியில் இப்போது பயன்படுத்தும் கல்ட் 10 போனை வாங்கி அதில் சில கூகுள் ஆப்ஸை நிறுவுவதற்காக, என்னுடைய டெஸ்க் டாப்பில் கூகுள் ப்ளே ஸ்டோரில் போய் முயற்சிக்கையில் முதல் தகவல் என்னுடைய தொலைந்து போன போனில் ஏர்டெல் கார்டு போட்டு இருப்பதாகத் தெரிந்தது. ஓரிருநாளில் அந்த கார்டை மாற்றி bpl card போட்டிருப்பதாக கூகுள் ப்ளே சொல்ல என்னுடைய ஆர்வம் அதிகரித்து விடாமல் கண்காணித்து வந்தேன். ஆனால் வெறுமனே கேரியர் பெயரை மட்டும் வைத்து எப்படிக் கண்டுபிடிப்பது? இந்தத் தகவல் தெரியாவிட்டால் மொபைலைத் தொலைத்துவிட்டுப் புலம்பி வேறு போன் வாங்கி உபயோகப் படுத்தும் இலட்சக் கணக்கானோரில் நானும் ஒருவனாகவே இருந்திருப்பேன். ஆனால், தொடர்ந்து கவனித்து வந்ததில் போனில் சில நாள் ஏர்செல் கார்டு போடுவதும் பின் சில நாள் எடுத்துவிட்டு மீண்டும் போடுவதும் மறுபடியும் எடுப்பதுமாக போனை எடுத்துப் பயன்படுத்தியவன் என்னுள் கண்டுபிடிக்கும் ஆர்வத்தையும் இல்லை வெறியையும் வளர்த்து வந்தான். மூன்று நாளைக்கு முன் மீண்டும் ஏர்செல் கார்டு போட்டு உபயோகிக்க ஆரம்பித்ததும் என் வெறி அதிகமாகி, சில நண்பர்களைத் தொடர்பு கொண்டேன். அவர்களின் உதவியோடு ஐஎம்ஐஈ எண் உதவி கொண்டு அந்த போன் எண்ணையும் அது இயங்கி வரும் இராமநாதபுரம் டவரையும் தெரிந்து, பின் ட்ரூ காலர் உதவியுடன் பெயரையும் தெரிந்து ஆள் இன்னாரென்று அறிந்து அவனின் அதிகாரி உதவியுடன் இன்று அவனிடம் பேசி போனை மீட்டு விட்டேன். அதன்மூலம் போனைத் தொலைத்துத் திரும்பப் பெற்ற விரல் விட்டு எண்ணக்கூடிய சிலரில் நானும் ஒருவனாகியிருக்கிறேன். எடுத்தவன் யார் தெரியுமா? என் வீட்டிலிருந்து இரண்டு மூன்று வீடுகளு தள்ளி வசிக்கும் ஒரு எம்சிஏ படித்த பிராமண இளைஞன். என்றோ எதற்கோ அவனை அவன் செய்த ஒரு தப்புக்காக நான் திட்டினேனாம். அதற்காகப் பழிவாங்க இப்படிச் செய்தானாம் அந்த "உலகு காப்பவன்"

சிலருக்கேனும் சந்தேகம் வரலாம். அது எப்படி கூகுள் ப்ளே காட்டும் என்று? ஆப்ஸை போனில் நேரடியாக நிறுவினால் ஒன்றும் தெரியாது. ஆனால் அதையே டெஸ்க் டாப் வழியாகப் பண்ணினால், நீங்கள் கூகுள் அக்கவுண்டில் எத்தனை டிவைஸ்களை ரெஜிஸ்டர் பண்ணியிருந்தாலும் அத்தனையையும் காட்டி எதில் நிறுவ என்று கேட்கும். அப்படிக் காட்டும்போதே அந்த டிவைஸ்கள் எந்த கேரியர் வழியாக (அதாவது பிஎஸ்என்எல், வோடோபோன், ஏர்டெல் என்று) இயங்குகின்றன என்பதையும் காட்டும்.

போன் தொலைந்துபோனபோது அதை இங்கு தெரிவித்திருந்தேன். பலர் வருத்தப் பட்டிருந்தார்கள். சிலர் எனக்காக ப்ரார்த்தனை பண்ணியிருக்கக் கூடும். அனைவருக்கும் அடியேனது நன்றிகள்.

செவ்வாய், 22 செப்டம்பர், 2015

Appeal

கரூர் மாவட்டம் குளித்தலை தாலுகாவில் நூதனமான ஸ்ரீ ராம ஆஞ்சநேயர் கோவில் கட்டப் பட்டு வருவதாகவும், அதை பூர்த்தி செய்ய ஏராளமான பொருள் தேவைப்படுவதாகவும், அடியேனுடைய நண்பரும், ப்ரதி வருடமும் தவறாமல் திருப்புல்லாணி தேசிகன் உத்ஸவத்தில் கலந்து கொண்டு பாராயண கைங்கர்யங்களை சிறப்பாகவும் நடத்திக் கொடுப்பவர் தெரிவிக்கிறார். அதற்கான வேண்டுகோள் ஒன்றையும் அடியேனிடம் அவர் தெரிவித்தார். அந்த வேண்டுகோளை இங்கு காணலாம். விருப்பமிருப்பவர்கள் உதவ வேண்டுகிறேன்.

வெள்ளி, 28 பிப்ரவரி, 2014

ராமாநுஜ தயாபாத்ர தனியனின் ஏற்றம்

இன்று அடியேன் படித்துக் கொண்டிருக்கும் “ஸ்ரீவேதாந்த தேசிகன் தனியனும் அதன் ஏற்றமும்” (நூல் கல்யாணபுரம் தேவஸ்தானம் ஸாமவேத வித்வான் ஸ்ரீ உ.வே. பார்த்தஸாரதி ஐயங்கார் ஸ்வாமி – 13-09-2007ல் அவரது ஜன்ம நக்ஷத்ர ஸாந்தி மஹோத்ஸவ மலராக வெளியிட்டது) நூலிலிருந்து ஒரு பகுதி

ராமாநுஜ தயாபாத்ர தனியனின் ஏற்றம்

ஸ்ரீ தேஶிகன் விஷயமான 3 தனியன்களில் முதலான விஷயங்கள் மூன்று என அநுபவிக்கப்பட்டது. அவற்றுள் மூன்றாவதான ராமாநுஜ தயாபாத்ரம் என்னும் தனியனுக்கு இன்னும் ஒரு படி ஏற்றம் உண்டு.

ரஹஸ்யத்ரயங்களில் सदैवं वक्त्ता என்கிற ஏற்றம் பெற்றது த்வயம்.

ஆசார்யர்களுக்குள் மற்றொருவருக்கும் கிடைக்காததாயும் ஸ்ரீதேஶிகன் ஒருவருக்கே கிடைத்ததுமான பெருமை வேதாந்தாசார்யர் என்னும் பிருது. இதைப் பலபடிகளாலும் தாம் நிர்வஹித்தருளிய ப்ரகாரத்தை ஸ்ரீதேஶிகன் தாமே அருளிச் செய்திருக்கிறார். நமது ஸம்ப்ரதாயத்தில் உபய வேதாந்தங்களும் ப்ரமாணங்களாக அங்கீகரிக்கப்பட்டிருக்கின்றன. அவற்றில் ஸம்ஸ்க்ருத வேதாந்தார்த்தங்களை ப்ரதிபாதிக்கிற ப்ரஹ்ம ஸூத்திரங்களின் வ்யாக்யாநமான ஸ்ரீபாஷ்யத்தின் அர்த்த ஸங்க்ரஹமான ஸ்ரீஅதிகரணஸாராவளியில்
तेन देवेन दत्तां वेदान्ताचार्यसंज्ञामवहित बहुवित्सार्थमन्वर्थयामि
என்று அநுஸந்தித்திருக்கிறபடியினால் ஸம்ஸ்க்ருத வேதாந்தங்களில் தாம் நிகரற்றவர் என்பதை வெளியிட்டருளினார்.

आचार्यप्रियचिकीर्षया प्रेरित: तत्प्रसादसन्धुक्षित तत्प्रबन्धानुसन्धान जनित ज्ञान भक्ति परिवाहरूपे स्तोत्रे

என்கிறபடியே த்ராவிட வேதங்களின் அநுஸந்தாந பரிவாஹமான ஸ்ரீஸ்தோத்ர ரத்நத்திற்கு வ்யாக்னமிட்டருளி அதன் இறுதியில்
स्वकमिति हरिदत्तं यामुन स्तोत्र वृत्तया व्यवृणुत निगमान्ताचार्यकं वेङ्कटेश:

என்றருளிச் செய்திருப்பதினாலே திரமிட வேதங்களில் தாம் நிலவர் என்பதை ஸ்தாபித்தருளினார். ஸ்ரீபாஷ்யத்திற்கு விஸ்தாரமான வ்யாக்யாநமான ஸ்ரீதத்வடீகையை यतिपतिभुवो भाष्यस्यासौ यथाश्रुतचिन्तित प्रवचनविधावष्टाविंशे जयध्वजपट्टिका என்றும் , ஸ்ரீசதுஶ்லோகீ பாஷ்யத்தில் व्यासन शमन व्यक्त्तोस्तेया जयध्वजपट्टिका என்றும் அருளிச் செய்திருப்பதினாலும் உபய வேதாந்தங்களில் பாண்டித்யத்தை உடையவர் என்பது தெரிவிக்கப் பட்டதாகிறது. இப்படி உபய வேதாந்தங்களிலும் ஆசார்யனாய் விளங்கின போதிலும்

1. செய்ய தமிழ்மாலைகள் நாம் தெளிய ஓதித் தெளியாத மறைநிலங்கள் தெளிகின்றோமே. 2. பாணன் ஓதியதோர் இருநான்கு இரண்டுமான ஒரு பத்தும் பற்றாக உண்ர்த்துரைத்தோம் 3. சந்தமிகு தமிழ்மறையோன் என்றிவை முதலாக அநுஸந்தித்திருப்பதினாலே ஒரு விஶேஷம் பெற்றதாயிருக்கும் த்ராவிட வேதங்கள். ஸம்ஸ்க்ருத வேதாந்தங்களின் வ்யாக்யாநங்களான ஸ்ரீபாஷ்யம், ஸ்ரீகீதாபாஷ்யம், முதலிய க்ரந்தங்களும் பகவானுடைய மஹிமையையே ப்ரதிபாதித்தபோதிலும், பகவத் குணாதிகளை நேரில் அவ்யவஹிதமாக ஒன்றும் விடாமல் ப்ரதிபாதிக்கிற த்ரமிட வேதங்களின் வ்யாக்யாநங்களுக்குப்போலே அவற்றுக்கு பகவத் விஷயம் என்னும் திருநாமம் கிடைக்கவில்லை. எம்பெருமானாலேயே மயர்வற மதிநலம் அருளப்பெற்று, அந்த ஜ்ஞாநத்தினாலேயே அவனை உள்ளபடியே அநுபவித்து, அநுபவித்தபடியே பேசுகிற பேச்சுக்களான திருவாய்மொழியின் முதல் வ்யாக்யாநமாக எம்பெருமானாருடைய நியமனத்தினால் பிள்ளான் பணித்தருளிய திரு ஆறாயிரப் படிக்கே அப்பெருமை. அதற்கு வ்யாக்யாநமான எழுபத்தி நாலாயிரப்படியின் காலக்ஷேப காலத்தில் அவதரித்த இத்தனியன் மற்றத்தனியன்களை விட ஓர் ஏற்றம் பெற்றிருக்கும்.

அன்றிக்கே, ஸ்ரீரங்கத்தில் தடைபட்டு நின்ற திருவத்யயனோத்ஸவத்தை ப்ரதிவாதிகளை நிரஸித்து அந்த மஹோத்ஸவத்தை நடத்தி வைத்த ஸமயத்தில் லக்ஷ்மீநாத ஸமாரம்பாம் என்னும் தனியனுக்கு முன்பு அநுஸந்திக்கும்படி ஸ்ரீரங்கநாதனால் நியமிக்கப்பட்ட பெருமை வாய்ந்திருக்கும் இத்தனியன் என்றபடியாகவுமாம்.

மற்றும், பூர்வாசார்யர்கள் எல்லோரும் உபய வேதாந்தங்களிலும் நிலவர்களாகிலும் அவர்கள் ஸ்ரீதேஶிகனைப்போலே உபயவேதாந்தாசார்யத்வத்தில் அபிஷிக்தர்களாகவில்லை. ஏனென்றால் --- ப்ரபந்நஜந கூடஸ்தரான ஆழ்வார் த்ரமிடோபநிஷத் த்ரஷ்டா என்கிற பெருமை பெற்றவர். யோகதசையில் ஸாக்ஷாத்க்ருதமாய் ஸ்ரீமந்நாதமுனிகளுக்கு உபயவேதாந்தங்களையும் உபதேஶித்தருளினாலும் க்ரந்த முகமான உபகாரம் த்ரமிட வேதங்களாலேதான். தமிழ் மறைக்குத் தாளம் வழங்கி இன்னிசை தந்த வள்ளலான ஸ்ரீமந் நாதமுனிகளும் திவ்ய ப்ரபந்தங்கள் விஷயமாய் க்ரந்த முகமாக உபகாரம் செய்தருளவில்லை. பெரிய முதலியாரும் த்ரமிடவேத த்ரஷ்டாவான ஆழ்வார் விஷயமாக ஒரு ஶ்லோகம் அருளிச் செய்திருந்தபோதிலும் திவ்ய ப்ரபந்தங்களின்ப்ரபாவாதிகளைப் பரக்க நிரூபித்தாரில்லை. தர்ஶந ப்ரவர்த்தகரான எம்பெருமானாருடைய திவ்ய ப்ரபந்தாநுஸந்தாந ஊற்றம் நூற்றந்தாதியில்

“மாறன் அடிபணிந்து உய்ந்தவன் பொய்கைப்பிரான் மறையின் குருத்தின் பொருளையும் செந்தமிழ்தன்னையும் கூட்டி – பூதத்திருவடித்தாள்கள் நெஞ்சத்துறைய வைத்தாளும் – கோவலுள் மாமலராள் தன்னோடு மாயனைக் கண்டமை காட்டும் தமிழ்த்தலைவன் பொன்னடி போற்றும் – சீரிய நான்மறைச் செம்பொருள் செந்தமிழாலளித்த பாரியலும் புகழ்ப்பாண் பெருமாள் சரணாம் பதுமத்தாரியல் சென்னி – இடம்கொண்ட கீர்த்தி மழிசைக்கிறைவன் இணையடிப் போதடங்கும் இதயத்து – செய்யும் பசும் துளவத் தொழில் மாலையும் செந்தமிழில் பெய்யும் மறைத் தமிழ்மாலையும் பேராத சீர்அரங்கத்து ஐயன் கழல் பணியும் –கொல்லி காவலன் சொல்பதிக்கும் கலைக் கவிபாடும் பெரியவர் பாதங்களே துதிக்கும் – பல்லாண்டென்று காப்பிடும் பான்மையன் தாள் பேராத உள்ளத்து – அரங்கர் மௌலி சூழ்கின்ற மாலையைச் சூடிக்கொடுத்தவள் தொல்லருளால் வாழ்கின்ற வள்ளல் – தண்தமிழ் செய்த நீலன் தனக்கு உலகில் இனியானை --- எய்தற்கரிய மறைகளை ஆயிரமின் தமிழால் செய்தற்கு உலகில் வரும் சடகோபனை – மாறன் விளங்கிய சீர்நெறி தரும் செந்தமிழ் ஆரணமே என்று – தென்குருகைப்பிரான் பாட்டென்னும் வேதப் பசும் தமிழ்தன்னை தன் பத்தி என்னும் வீட்டின் கண்வைத்த – திருவாய்மொழியின் மணம் தரும் இன்னிசை மன்னுமிடம்தொறும் நிற்கும் – பண்டரு மாறன் பசும் தமிழ் ஆநந்தம் பாய் மதமாய்” (இராமாநுஜ நூற்றந்தாதி)

முதலியவைகளில் விஶேஷமாக ப்ரதிபாதிக்கப் பட்டிருந்தபோதிலும், க்ரந்தமுகமாக ஆழ்வார்களைப் பற்றியோ அவர்கள் ப்ரத்யக்ஷீகரித்து வெளியிட்டருளிய த்ராவிட வேதங்களைப் பற்றியோ அவர் ஓரிடத்திலும் நிரூபிக்கவில்லை. எம்பெருமானாரால் உபய வேதாந்த ஸிம்மாஸனத்தில் அபிஷிக்தரான பிள்ளானும் த்ரமிடோபநிஷத்தின் அர்த்த விஶேஷங்களை ஆறாயிரப்படியில் பரக்க நிரூபித்திருந்தாலும் ஆழ்வார்களின் அவதாரப்ரபாவ விஷயமாய் ஒன்றும் நிரூபிக்கவில்லை. ஸ்ரீதேஶிகன் ஒருவரே தான் வேதாந்தாசார்யர் என்னும் தம்முடைய திருநாமத்திற்கேற்ப உபய வேதாந்தங்களின் அர்த்தங்களையும், அவற்றின் உத்கர்ஷத்தையும், ஆழ்வார்கள் த்ரமிட வேத த்ரஷ்டாக்கள் என்பதையும், அவர்களுடைய அவதார ப்ரபாவத்தையும் வெளியிட்டருளியவர். இப்படி உபய வேதாந்தங்களிலும் நிலவரான ஸ்ரீ தேஶிகனாலே
नित्यम् जाता शठारिपु तनो: निष्पतन्ति मुकात्ते|
प्राचीनानां श्रुतिपरिषदां पादुके पूर्वगण्या || (பாதுகாஸஹஸ்ரம்)
என்று கொண்டாடப் பட்டிருக்கும் பெருமையையுடையவைகள் த்ராவிட வேதங்களே. இப்படிப்பட்ட ஏற்றமுடைய த்ரமிட ப்ரபந்தங்களின் தனியன் என்னும் பெருமை பெற்றது.

மேலும், ரஸங்களுக்குள் உத்க்ருஷ்டமான ஶாந்தி ரஸத்தை ப்ரதாநமாக ப்ரதிபாதிக்கிறபடியினாலும் ஸம்ஸ்க்ருத வேதங்கள்போல் த்ரைவர்ணிகர்களுக்கு மட்டுமன்றிக்கே ஸர்வாதிகாரங்களாய் நிற்கிறபடியினாலும் பெருமை பெற்ற த்ரமிட வேதங்களுக்குத் தனியன் என்கிற உத்கர்ஷம் பெற்றிருக்கும்.

அன்றிக்கே, ஶரணாகதியையும், அதன் அங்கங்களையும், அதற்கு இன்றியமையாததான பகவானுடைய கருணையையும் அர்ச்சாவதாரத்தையும் விஶேஷித்து ப்ரதிபாதிக்கிறது என்கிற பெருமையையும் பெற்ற “திராவிடவேதங்களின் தனியன்” என்கிற பெருமையும் வாய்ந்தது.

பின்பும் नाथे न: என்கிற ஶ்லோகத்தில் பாகவதர்களின் ப்ரஸாதமே நமக்கு உத்தேசமென்றும், आचार्यादिह देवतां समधिकामन्यां न मन्यामहे| என்கிற ஶ்லோகத்தின்படியே ஆசார்யனுடைய கடாக்ஷத்தையே நாடவேண்டும் என்பதையும் இது காட்டுகிறது.

(இது சேட்லூர் ஸ்வாமி மணிப்பிரவாளத்தில் எழுதியதின் தமிழாக்கம் என்று நூலில் சொல்லப் பட்டுள்ளது)

புதன், 21 ஆகஸ்ட், 2013

திருமண்

நாம் தினமும் அணியும் திருமண் எங்கே கிடைக்கிறது அது எப்படித் தயாரிக்கப் படுகிறது? அதை நமக்கு அளிப்பவர்கள் வாழ்க்கை நிலை என்ன?
இதோ இந்தக் குறும்படத்தைப் பாருங்கள்

சனி, 15 ஜூன், 2013

ச்ராத்தம் உண்டானது எப்படி?

உலகில் முதலில் ச்ராத்தம் உண்டானது எப்படி என்று அறிந்துகொள்வது அவசியம்.

அது ஸ்ரீமன் மஹாபாரதத்தில் அநுசாஸன பர்வத்தில் 138வது அத்யாயத்தில் பரக்க நிரூபிக்கப்பட்டிருக்கிறதாம்.

அதைப்பற்றி ‘ஸ்ரீவேதாந்த தீபிகை’யில் அடியேன் படித்த ஒரு கட்டுரையை இங்கு பகிர்ந்து கொள்கிறேன்.

ப்ருஹ்மாவிடமிருந்து அத்ரி என்னும் ஒரு மஹரிஷி உண்டானார். அந்த மஹரிஷிக்கு தத்தாத்ரேயர் என்னும் ஒரு பிள்ளை பிறந்தார். அவருக்கு நிமி என்னும் ஒரு புத்ரனுண்டானார். அவர் மிகவும் தபஸ்வி. அவருக்கு ஸ்ரீமான் என்று ஒரு புத்திரர் பிறந்தான். அவன் மஹா தபஸ்வியாயிருந்து ஒரு ஆயிரம் வருஷம் தபஸ் செய்துகொண்டிருக்கையில் ஒரு நாள் அவன் காலமாய்விட்டது. நிமி புத்ர சோகத்தால் மனவருத்தமுற்று மிகவும் வருந்தி அவனுடைய சரீரத்தை ஸம்ஸ்காரம் செய்து தனக்கு நேர்ந்த ஆபத்தை நினைத்து வருந்திக் கொண்டிருந்தார். சதுர்த்தசியன்று அநேக த்ரவ்யங்களைச் சேர்த்து அன்று ராத்திரி துக்கப்பட்டே நித்ரையை அடைந்தார். விடியற்காலத்தில் எழுந்து என்ன செய்கிறது என்று யோசிக்கத் தொடங்கினார். அப்பொழுது அவர் மனதில் சில பிராஹ்மணர்களை அழைத்து, போஜனம் செய்வித்தால் தன் பிள்ளையின் ஆத்மாவுக்குத் திருப்தி உண்டாகும் என்று ஓர் எண்ணம் உண்டாயிற்று. அதை யோஜித்துப் பார்க்க மிகவும் சரி என்று அவர் மனதில் பட்டது. பொழுது விடிந்ததும் அமாவாஸ்யை அன்று தன் பிள்ளைக்கு எந்த எந்த பதார்த்தங்களிலிஷ்டமோ அவை அவ்வளவையும் சேகரித்து அவைகளை அவனுக்கு இஷ்டமானபடி பாகம் செய்வித்து, ஏழு ப்ராஹ்மணர்களை அழைத்து, அவர்களுக்கு அர்க்ய, பாத்ய, ஆசமநீயம் கொடுத்து, தர்ப்பாஸனத்தில் அவர்களை உட்காரவைத்து, ச்யாமாகான்னத்தையும் இன்னும் ஸித்தம் பண்ணிவைத்த எல்லா பதார்த்தங்களையும் உப்பு இல்லாமல் போஜன பாத்ரத்தில் பரிமாறி அமுது செய்வித்து, அவர்களுக்குப் பக்கத்தில் தர்ப்பத்தைத் தெற்குநுனியாக வைத்து அதன்மேல் (தன் பிள்ளையின் கோத்ரத்தையும் பெயரையும் சொல்லி) அன்னத்தால் செய்த பிண்டங்களை வைத்துத் தத்தம் செய்தார். எல்லாம் முடிந்து ப்ராஹ்மணர்களும் அவரவர்கள் க்ருஹங்களுக்குப் போனபிறகு, நிமிக்கு இதுவரை ஒருவராலும் அனுஷ்டிக்கப்படாத கார்யத்தைச் செய்தோமே, அது சரியாகுமோ ஆகாதோ என்று பச்சாத்தாபமும், ருஷிகள் இதைக்கண்டு தன்னைச் சபித்துவிட்டால் என்ன செய்கிறது என்று பயமுமுண்டாயிற்று. இந்தத் துக்கத்தால் மிகவும் வருத்தமுற்று, தன் வம்சகூடஸ்தரான அத்ரிமஹரிஷியை த்யானம் செய்தார். இந்த வருத்தத்தை அறிந்த அத்ரிமஹரிஷியும் உடனே நிமி முன் ப்ரத்யக்ஷமாகி, புத்ர சோகத்தால் வருந்தும் நிமிக்கு ஸமாதானம் பண்ணி ஆதரவான வார்த்தைகளைச் சொல்லி, “ உன் மனஸில் தோன்றி, பிறகு நீ அனுஷ்டித்த கர்மாவானது பித்ருக்களுக்குச் செய்த யாகம்; நீ பயப்படாதே, நீ தபோதனன் அல்லவா, இறந்துபோனவர்களுக்கு இவ்விதம் கர்மா செய்யவேண்டுமென்று ப்ருஹ்மாவாலேயே வெகுகாலத்துக்கு முன் ஸங்கல்பிக்கப் பட்டிருந்தது. நீ செய்த காரியம் ப்ருஹ்மாவால் முன்னமே ஸங்கல்பிக்கப் பட்டதுதான். உன் தபோபலத்தால் உன் மனதில் தோன்றும்படி அவர் அனுக்ரஹித்தார். ஆகையால் நீ செய்தாய். ப்ருஹ்மாவைத்தவிர எவர் இந்தக் கர்மாவை ஏற்படுத்த முடியும்? ச்ரத்தையுடன் செய்கிற கர்மாவாகையால் இதற்கு ச்ராத்தம் என்று பெயர்” என்று சொல்லி, பிறகு அவருக்கு ச்ராத்தம் செய்யும் ப்ரகாரத்தை விஸ்தாரமாய் உபதேசித்துவிட்டு ப்ருஹ்மலோகம் போய்ச்சேர்ந்தார். பிறகு நிமி அதேமாதிரி அனுஷ்டிக்க ஆரம்பித்தார். இவரைப் பார்த்து மற்ற எல்லா ருஷிகளும் செய்யத் தொடங்கினார்கள். அதுமுதல் ச்ராத்தம் உலகத்தில் செய்ய ஆரம்பிக்கப்பட்டது.

பிறகு, பித்ருக்கள் என்பவர்கள் எவர்? ஏன் அவர்களுக்கு அந்தப் பெயர் வந்தது? என்று விசாரிப்போம். முன் ஒரு காலத்தில் ப்ருஹ்மா தேவர்களை ஸ்ருஷ்டித்து நீங்கள் என்னை யஜ்ஞங்களால் ஆராதித்து வாருங்கள் என்று கட்டளையிட்டார். இவர்கள் ப்ருஹ்மா கட்டளையிட்டபடி செய்யாமல் தங்களுடைய இந்திரியங்களை த்ருப்தி செய்துகொண்டு காமபரவசர்களாகி ஜ்ஞான சூன்யர்களாகி விட்டார்கள். இவர்களுடைய நடத்தையைப் பார்த்து ப்ருஹ்மாவும் ஜ்ஞானமில்லாமல் போகக்கடவீர்களென்று சபித்துவிட்டார். அவர்களிருந்த லோகமும் இவர்களைப்போல் ஜ்ஞானமில்லாமல் ஆகிவிட்டது. இந்தத் தேவர்கள் பிறகு வெட்கத்துடன் ப்ருஹ்மாவைச் சரணாகதி செய்தார்கள். அவர் நீங்கள் சரியான நடத்தை யில்லாதவர்களாயிருந்ததால் தபோதனர்களான உங்களுடைய பிள்ளைகளிடம் போய் ப்ராயச்சித்தம் செய்து ஜ்ஞாநோபதேசம் செய்துகொள்ளுங்கள் என்று உத்தரவு செய்தார். தேவர்களும் அப்படியே அவர்களுடைய பிள்ளைகளை ப்ராயச்சித்தம் செய்யும்படி வேண்டிக்கொள்ள, அவர்கள் தங்களுடைய தகப்பனார்களான தேவர்களுக்கு ப்ராயச்சித்தமும் ஜ்ஞாநோபதேசமும் செய்து, “பிள்ளைகளே, போங்கள்” என்று சொல்லி அனுப்பி விட்டார்கள். தேவர்கள், தங்களுடைய பிள்ளைகள் தங்களைப் புத்திரர்கள் என்று சொன்னதால் கோபங்கொண்டவர்களாய் ப்ருஹ்மாவிடம் முறையிட, அவரும் “அவர்கள் செய்ததும் சரிதான். நீங்கள் அவர்களுடைய சரீரத்தை உண்டாக்கினீர்கள். அதனால் நீங்கள் அவர்களுக்குப் பிதாக்கள். ஆனால் அவர்கள் உங்களுக்கு ஜ்ஞானத்தைக் கொடுத்ததால் அவர்கள் உங்களுக்குப் பிதாக்கள் . ஆகையால் அவர்கள் சொன்னது சரிதான் . இதுமுதல் அவர்கள் ஜ்ஞானத்தால் உங்களுக்குப் பிதாவானதால் அவர்கள் பித்ருக்கள் என்று வழங்கப்படட்டும். நீங்கள் தேவர்களென்று வழங்கப்படுவீர்கள்” என்று ஆணையிட்டார். அதுமுதல் அவர்கள் பித்ருக்களானார்கள்.

இந்தப் பித்ருக்கள் ஏழுகணங்கள் அல்லது ஸமூஹங்கள். அவர்களில் நான்கு கணத்தார் உருவை உடையவர்கள். மூன்று கணங்கள் மூர்த்தி இல்லாதவர்கள். ஸுகாலர்கள், ஆங்கிரஸர்கள், ஸுஸ்வதர்கள், ஸோமபர்கள் என்று நாலு கணத்தார்களும் மூர்த்தியையுடையவர்கள். இவர்கள் கர்மத்தால் பிறந்தவர்கள். வைராஜர்கள், அக்னிஷ்வரத்தர்கள், பர்ஹிஷதர்கள் என்று மூன்று கணத்தார்கள் மூர்த்தி இல்லாதவர்கள். தங்களுடைய தர்மபூத ஜ்ஞானத்தால் விபுவாயுமிருப்பார்கள். அணுவிலேயும் ப்ரவேசிக்கச் சக்தி உள்ளவர்கள். தங்களுக்கு இஷ்டமான ரூபங்களை எடுத்துக்கொண்டு ஸஞ்சரிக்கிறவர்கள். இவர்கள் வஸிக்குமிடத்துக்கு ஸநாதன லோகம் என்று பெயர். அதற்குப் பித்ரு லோகம் என்றும் பெயர். இவர்களுக்குப் பித்ருகணங்கள் என்று பெயர்.

நம்மால், நம்முடைய இறந்துபோன பிதா, பாட்டன், ப்ரபிதாமகன் முதலானவர்களுக்குக் கொடுக்கப்பட்ட ஹவிஸ்ஸு எப்படி அவர்களுக்குப் போய்ச்சேருகிறது? என்றால் இறந்துபோன பந்துக்களுக்கு நேராகப் போவதில்லை. அவைகள் பித்ருக்களுக்குப் போகின்றன. அவர்கள் தங்களுடைய யோகபலத்தால் பூர்புவஸ்ஸுவ: என்னும் பெயருள்ள மூன்று லோகங்களிலிருக்கும் தேவ கந்தர்வ மனுஷ்யர்கள் முதலிய எல்லாப் பூதங்களுக்கும் அவர்கள் எவ்விடத்திலும் எந்த ரூபத்திலிருந்தாலும் அவர்களுக்குச் சேரும்படி செய்கிறார்கள். பீஷ்மர் அவருடைய தகப்பனாருடைய ச்ராத்தம் செய்து பிண்டதானம் செய்யும்போது பூமியைப்பிளந்துகொண்டு ஒருகை வெளியில் வந்து பிண்டத்தைக் கொடு என்று கேட்டது. அதில் அநேக ஆபரணங்களும் கேயூரங்களும் அணியப்பட்டிருந்தன. அந்தக்கை அவருடைய தகப்பனாருடையது. அவர் செத்துப்போவதற்கு முன்னிருந்ததுபோலவே இருந்தது. பீஷ்மரும் இந்தக் கல்பத்தில் பிதா கையில் பிண்டதானத்தைச் செய்வது சரியில்லையென்று நினைத்து பூமியில் தர்ப்பத்தைப் போட்டு அதில் தத்தம் செய்தார். தர்மம் தெரிந்து நடந்ததற்கு அவர் தகப்பனார் சந்தோஷப்பட்டு அவருக்கு ஸ்வச்சந்த மரணம் உண்டாகட்டும் என்று அனுக்ரஹம் செய்து மறைந்துவிட்டார். ஆகையால் நாம் செய்யும் பிண்டதானமும், ஹவிஸ்ஸும், மேற்கூறிய பித்ரு தேவதைகளுக்குப்போய் அவர்களால் இறந்துபோன பந்துக்களான ஜீவாத்மாக்களுக்குச் சேர்ப்பிக்கப் படுகின்றன. இந்த ரஹஸ்யம் மார்க்கண்டேயருக்கு ஸநத்குமாரரால் சொல்லப்பட்டது என்று ஹரிவம்சத்தில் முதல் பர்வத்தில் 16, 17வது அத்யாயங்களில் சொல்லப்பட்டிருக்கிறது.

நிமி ஏற்படுத்தின ப்ரகாரம் எல்லாரும் ச்ராத்தம் செய்ததும், பித்ருக்கள் ஏராளமான ஹவிஸ்ஸை புஜித்து அஜீர்ணமுண்டானவர்களாய் சந்த்ரனிடம் முறையிட்டார்கள். அவர் ப்ருஹ்மாவிடம் போகும்படி சொல்ல, பித்ருக்கள் ப்ருஹ்மாவிடம் போய்த் தங்களுடைய கஷ்டத்தை நிவிர்த்திக்கும்படி வேண்டிக்கொண்டார்கள். அவர் அக்னி பகவான் உங்கள் குறையை நிவர்த்திப்பார் என்றார். பிறகு பித்ருக்கள் அக்னியை வேண்ட, அவரும் இனி ஹவிஸ்ஸுக்களை என்னுடன் புஜியுங்கள், அதிகமான பாகங்களை நான் சாப்பிட்டுவிடுகின்றேன் என்று சொன்னார். அதுமுதல் அக்னியில் ஹவிஸ்ஸானது ஹோமம் செய்யப்பட்டு வருகிறது.

ஆதலால் ச்ராத்தமென்பது ஆதிகாலத்திலேயே வேதங்களான ப்ரமாணங்களைக் கொண்டு, ப்ருஹ்மாவால் அறியப்பட்டு, அவருடைய ப்ரபௌத்ரனாகிய நிமிக்குத் தபோமஹிமையால் ப்ரகாசித்து, அதை, இது ப்ருஹ்மாவினுடைய இஷ்டத்தை அனுஸரித்ததுதான் என்று அந்த நிமி தெரிந்து, தான் அனுஷ்டித்து, பிறரை அனுஷ்டிக்கும்படி செய்த முக்யமான கார்யம். இதில் ப்ராஹ்மணர்களுக்குக் கொடுக்கப்படுகின்றனவும் அக்னியில் ஹோமம் செய்யப்படுகின்றனவுமான த்ரவ்யங்கள் எல்லாம் பித்ருகணங்களென்று சொல்லப்படும் தேவதைகளின் வழியாக நம்முடைய இறந்துபோன பந்துக்களுக்கு எந்த லோகத்திலும் எந்த ஜன்மத்திலும் போய்ச்சேர்ந்து அவர்களுக்கு த்ருப்தியை உண்டாக்குகிறதென்று சாஸ்த்ரங்களில் ஏற்பட்ட வ்யவஸ்தை. இது இப்படிநிற்க, இறந்துபோன பந்துக்கள் ப்ரபன்னர்களாய் மோக்ஷத்தை அடைந்தவர்களாய் இருந்தால் அவர்களுக்குப் பசி, தாஹம் முதலியது ஒன்றுமில்லாமலிருந்தபோதிலும் சாஸ்த்ரங்களில் ஏற்பட்ட மரியாதையை ஒருவனும் குலைக்கக்கூடாது என்று பகவத்கீதை பாஞ்சராத்ர சாஸ்த்ரம் முதலியவைகளில் சொல்லப்படுகிறபடியினால் பகவானுடைய ஆராதனமாக எண்ணி ச்ராத்தங்களைச் செய்யவேண்டியது. அதனால் பகவான் தானே த்ருப்தியடைகிறார். அப்படிச் செய்யாதவர்களுக்குப் பொதுவான சாஸ்த்ர மரியாதையைக் குலைப்பதினாலுண்டாகும் பகவானுடைய கோபமும் அதனால் சிக்ஷையும் வருமென்று பூர்வாசார்யர்களுடைய தீர்மானம்.

சனி, 18 பிப்ரவரி, 2012

Vedanta Desikam

திங்கள், 30 ஜனவரி, 2012

அஞ்சனை ஈன்றெடுத்த

அடியேன் மீது அதிகப் பிரியம் காட்டும் ஸுஹ்ருதயர்களில் திரு ராகவன் ஸ்வாமியும் ஒருவர். இன்று ஒரு நல்ல வீடியோவை அனுப்பியிருந்தார். இனிய குரலில் ஆஞ்சநேயன் புகழ் பாடும் அந்த வீடியோவை இங்கு எல்லாருடனும் பகிர்ந்து கொள்வது அடியேனுக்கு மகிழ்ச்சியான ஒன்று.

சனி, 7 ஜனவரி, 2012

தங்கமோ தங்கம்!

புத்தாண்டு வாழ்த்துக்கள் என்று ஒரு நண்பர் இன்று வந்தார். வந்தவர் ஒரு காலண்டரையும் அன்பளித்து விட்டுச் சென்றார். அவர் போன பிறகு அதைப் பிரித்துப் பார்த்தேன்.

பழைய நூல்களைப் படிக்கும்போதும், அந்தக் காலத்தில் வாழ்ந்த அறிஞர்களைப் பற்றி வாசிக்கும்போதும் '”அடடா! 1920களில் பிறக்காமல் போனோமே! பிறந்திருந்தால் அந்த நூல்களையும், அம்மஹான்களையும் அனுபவித்திருக்கலாமே!” என்று தோன்றும்!(இப்போது மட்டும் என்ன படித்து, தெரிந்து அனுபவித்து விட்டாய்! அன்றும் நீ இன்றுபோலத் தான் எதையும் தெரிந்து கொள்ளாமல் வீண் போது போக்கியிருப்பாய்! என்று மனச்சாட்சி கேலி செய்கிறது!) இந்த காலண்டரைப் பார்த்தவுடனேயும் அப்படித்தான் தோன்றியது.

சென்னை உம்மிடி பங்காரு செட்டி நகைக்கடைக்காரர்கள் வெளியிட்டுள்ள அந்த காலண்டரில் 1940லிருந்து இன்று வரை தங்கம் மற்றும் வெள்ளியின் விலையைக் குறிப்பிட்டுள்ளார்கள். அன்று பிறந்திருந்தால் தங்கமோ தங்கம் என்று வாங்கிக் குவித்திருக்கலாம் இல்லயா?

(இதைப் பார்த்தால் ,படித்தால் அடியேன் யஜமானி அம்மா 1978லிருந்து வாங்கியிருந்தாலும் போதுமே! ஒரு சமர்த்துக் கிடையாத உங்களுக்கு வாக்கப்பட்டு…. என்று ஒரு பிடி பிடித்தாலும் பிடிக்கலாம்!)

(மீண்டும் மனச்சாட்சி! “ஆனால் அன்று இணையம் என்று ஒன்று கிடையாதே! இப்போது அந்த இணையத்தின் வாயிலாகத்தானே கோவை என்ன! சென்னை என்ன! அமெரிக்கா என்ன என்று தங்கத்துக்கும் மேல் பல மடங்கு உயர்ந்த ஸுஹ்ருதயர்களைப் பெற்றிருக்கிறாய்! அதனால் அன்றைக் காட்டிலும் இன்றே மேல் !”)

அந்த நாளில் எம்.ஜி.ஆர் “நான் உயர உயரப் போகிறேன்! நீயும் வா” என்று பாடியதுபோல தங்கம் வெள்ளியையும் சேர்த்து இழுத்துக் கொண்டு விலை உயர்ந்ததைப் பாருங்களேன்.

சனி, 24 டிசம்பர், 2011

ஆசை முகம் மறந்து போச்சே!

புதன், 19 அக்டோபர், 2011

ஒரு புதிய வரவு

பல பழைய நூல்களை என்னுடைய bed scanner மூலம் ஸ்கான் செய்ய நான் படுகின்ற சிரமங்களையும் அதைக் காட்டிலும் அந்த நூல்கள் ஸ்கான் செய்த பின் அட்டைகள் அகன்று பைண்டிங் பிரிந்து பாழாவதையும் கண்டு இரக்கப் பட்டு அடியேன் குமாரத்தி இன்றுஅடியேனுக்கு ஒரு அன்பளிப்பு கொடுத்திருக்கிறாள்,

அது ஒரு portablescanner. பாட்டரியில் இயங்குகிறது. கம்ப்யூட்டர், கரண்ட் எதுவும் தேவையில்லை. வீட்டில் வெளியில் என எங்கு வேண்டுமானாலும் கொண்டு சென்று எளிதில் ஸ்கான் செய்யமுடியும். விலை ரூ 6000/- இனி மிகப் பழைய நூல்களை எளிதில் ஸ்கான் செய்து விடலாம். நூல்களை இரவல் தர விரும்பாத நண்பர்கள் வீட்டிலேயே அந்நூல்களை படி எடுத்துக் கொண்டு வந்து விடலாம். மெமரி கார்டு, ப்ளூ டூத் usb எனப் பல வசதிகளோடு இருக்கும் இந்த ஸ்கானர் 300 மற்றும் 600 DPI color or black&white options இவைகளுடன் மட்டுமில்லை OCR software உடனும் வருவதால் மிக வசதி. குறிப்பாக கல்லூரி மாணவர்களுக்கு !பல நூல்களை xerox எடுக்க வேண்டிய சிரமம் இல்லை. நூலகங்களில் இருந்து நேரடியாக நூல்களை ஸ்கான் செய்து பின் தங்களின் கணிணிகளில் அவர்கள் சேமித்துக் கொள்ளலாம்.

சென்னையில் M/S Navkar computers, shop no 511, KAJ Plaza, FirstFloor, 838, Anna Salai, (7, narasingapuram street) Chennai என்ற இடத்தில் கிடைக்கிறது.

ஒரு சாம்பிள் இங்கே!

செவ்வாய், 11 அக்டோபர், 2011

A Demo in our village

இந்த சந்தைப்படுத்துதல் --- மார்க்கெட்டிங் என்றால் எளிதாகப் புரியுமோ – வளர்ச்சிதான் எவ்வளவு அபாரமாய் இருக்கிறது! 30, 40 வருடங்களுக்கு முன் ஒரு காஷ்மீர் குசும், அல்லது பாண்ட்ஸ் பவுடர் விளம்பரங்கள் அங்கொன்றும் இங்கொன்றுமாக கருப்பு வெள்ளையில் படம் என்கிற பேரில் கரேல் என்று ஒரு ப்ளாக்குடன் வரும். ஜெமினி எஸ்.எஸ். வாசன் முயற்சியால் அன்றே பல விதமான விளம்பர உத்திகள் பயன்படுத்தப்பட்டு அவரால் விளம்பரப் படுத்தப் பட்ட பொருட்கள் அமோகமாக விற்பனையானதாம். அதன் பின் படிப் படியாக முன்னேறி, அடுத்த கட்டமாக விளம்பரக் குறும் படங்கள் சினிமா காட்சிகளுக்கு முன் காட்டப்பட்டு முதலில் வரவேற்பைப் பெற்றாலும் பின்னால் சலிப்பையும் உண்டு பண்ணின. அதிலும் திரைப்படம் தலைவலி தருவதற்கு முன்னமேயே வரும் சாரிடான் விளம்பரங்களை இன்னும் பலர் மறந்திருக்க மாட்டார்கள். அச்சுக் கலைகள் வளர வளர விளம்பரங்களும் கண்ணைக் கவரும் வண்ணம் பத்திரிகைகளில் வர ஆரம்பித்துப் பின்னர் மல்ட்டி மீடியா தொழில் நுட்பங்களால் தொலைக் காட்சிகளில் சில நொடிகளுக்குப் பல்லாயிரம் ரூபாய் கட்டணத்தில் வர ஆரம்பித்து இன்று பல விளம்பரங்கள் தொலைக் காட்சி நிகழ்ச்சிகளைக் காட்டிலும் சுவையாக உள்ளன. எனக்கு ஒரு விசித்திரமான நண்பர் விளம்பரங்கள் முடிந்து நிகழ்ச்சி ஆரம்பிக்கும்போது ரிமோட்டை அழுத்தி அடுத்த சானல் விளம்பரத்தைப் பார்க்க ஆரம்பித்து விடுவார். மனம் கவர்கின்ற வகையில் வரும் விளம்பரங்கள் இடையில் முகம் சுளிக்க வைக்கின்ற , இலை மறைவு காய் மறைவாய்ச் சொல்ல வேண்டியவற்றையெல்லாம் அம்பலப் படுத்தி ஆபாசத்தின் எல்லையைத் தொடும் சில விளம்பரங்களும் உண்டுதான். இப்படி ஊடகங்களின் வாயிலாக விளம்பரம் காணாது என்று அடுத்த கட்டமாக தங்கள் பொருட்களைச் சந்தைப் படுத்த இப்போது நேரடி செயல் விளக்கம் demo என்ற ஆரம்பித்திருக்கிறார்கள். சென்னை போன்ற பெரு நகரங்களில் ஒரு நாளைக்கு ஒரு ஏழெட்டுப் பேராவது கழுத்தில் டையுடன் ஒரு பெரி…..ய்ய பையைத் தூக்கிக் கொண்டு வந்து நின்று வீட்டுக் கதவைத் தட்டி ஏதேனும் ஒரு பொருளை இயக்கிக் காட்டி எப்படியாவது அதை நம் தலையில் கட்டப் படாத பாடு படுவது பலர் அறிந்ததே. இது போதாது என்று இந்த டெமோக்களுக்கென்றே அவ்வப்போது கண்காட்சிகள் வேறு. அவ்வளவு பெரிய சாம்சங் நிறுவனப் பிரதிநிதியையே சென்னை ரிச்சி தெருவில் சாலை ஓரத்தில் அவர்களது ஏதேனும் ஒரு தொலைக் காட்சிப் பெட்டியையோ கம்ப்யூட்டர் மானிட்டரையோ வைத்துக் கொண்டு கூவி அழைப்பதைப் பார்க்கலாம். இப்படிப் பரிணாம வளர்ச்சி அடைந்துள்ள மார்க்கெட்டிங் சிற்றூர்களில் எப்படி? இங்கு காய்கறி வெட்டும் கத்திதான் அடிக்கடி சாலை ஓரங்களில் டெமோ செய்யப்படும். வியாபாரி கையில் படு வேகமாய்ச் சுழன்று நிமிடத்தில் ஒரு கிலோ முட்டைக் கோஸை தேங்காய்ப்பூ போல வெட்டும் அந்தக் கத்தி அதை நாம் ஆசையுடன் வாங்கி வந்தால் ஆடாமல் அசையாமல் நின்று, காயை வெட்டாமல் நம் விரலை வெட்டும்.

ஆனால் இன்று ஒரு வித்தியாசமான காட்சியைப் பார்த்தேன். ஒரு மாட்டு வண்டி நிறைய சுட்ட செம்மண் அடுப்புகளை ஒரு வியாபாரி கொண்டு வந்து தெரு ஓரத்தில் கடை பரத்தினார். அட பாவமே!ஊரெல்லாம் காஸ் அடுப்பு என்று கிராமமே மாறிப் போன நிலையில் இந்த அடுப்பை யார் வாங்கப் போகிறார்கள் என்று சற்று இரக்கத்துடன் வேடிக்கை பார்த்துக் கொண்டிருந்தேன். நம்மால் இரக்கம்தானே பட முடியும்? 44ம் பட்டம் ஸ்ரீமத் அழகியசிங்கரைப்போல் செய்யமுடியுமா? நினைத்ததுபோல உடனடியாக யாரும் வாங்க வரவில்லை. தனி அடுப்பு,

கொடி அடுப்பு,, கொடி அடுப்பை இணைத்துக் கொள்ளும் அடுப்பு, பால் அடுப்பு என்று வித விதமான அடுப்புகள். நகர்ப்புர வாசிகள் மறந்தே போனவை. அரை மணி நேரம் கழித்து வியாபாரி மெள்ள ஒரு அடுப்பைப் பற்ற வைத்து அதனுடன் ஒரு கொடி அடுப்பையும் பற்ற வைத்து அதில் சோறு பொங்க ஆரம்பித்தார். அடியேனுக்குத் தான் பொறுக்காதே! அவரிடமே கேட்டேன். “ என்ன செய்கிறீர்கள்” என்று. அவர் சொன்னார் “ நான் சமைத்தது மாதிரியும் இருக்கும். அடுப்பு எப்படி எரிகிறது என்று போகிற வருகிறவர்கள் பார்க்கிற மாதிரியும் இருக்கும்” அட! இது பிரமாதமான டெமோவாக இருக்கிறதே என்று சிரித்தேன்.

ஆனால் அவர் விவரமானவர் என்பது அடுத்த சில நிமிடங்களில் தெரிந்தது. அடுப்பு எரிவதை வந்து நின்று கவனித்த ஒரு அம்மா பேரம் பேசி ஒரு அடுப்பை வாங்கிச் சென்றார். அடுத்த சில நிமிடங்களில் பெண்கள் கூட்டமாய் வந்தார்கள். “தைப் பொங்கலுக்குத் தேடி அலைய முடியாது.” என்று சொல்லி வீட்டிற்கு ஒன்றாய் வாங்கிச் செல்ல சோறு பொங்கி வியாபாரி சாப்பிட்டு முடிவதற்குள், அடுப்பு எல்லாம் வித்துப் போச்சு.

வெள்ளி, 23 செப்டம்பர், 2011

எச்சரிக்கை! இது உங்களுக்காக இல்லை!

வழக்கமாக இந்த வலைக்கு வருகை தரும் பெரியவர்கள் அடியேனை மன்னிக்க வேண்டுகிறேன். இந்தப் பதிவு நிச்சயம் உங்களுக்காக இல்லை! உங்கள் வீட்டில் இருக்கும் பேரக் குழந்தைகளுக்காக!

யூட்யூபில் எதையோ தேடிக் கொண்டிருந்தேன். எதேச்சையாக சில வீடியோக்கள் கண்ணில் பட்டன. அவை அடியேனை எனது சிறு பிராயத்தில் என்னையொத்த குழந்தைகளை வைத்துக் கொண்டு எங்கள் பாட்டி பாடிக் காண்பித்த அந்தக் காலத்தை ஞாபகப் படுத்தின. உங்களுக்கும் அந்த நாள் ஞாபகங்கள் வரலாம். ஆனாலும் மீண்டும் சொல்கிறேன். இவை வீட்டில் இருக்கும் வாண்டுகளுக்குத்தான். அனேகமாகத் தமிழையே மறந்து, வன்முறைக் காட்சிகள் நிறைந்த தொலைக்காட்சிகளிலேயே மூழ்க ஆரம்பித்திருக்கும் நம் குழந்தைகளுக்கு இப்படி சிலவற்றைக் காண்பித்து மகிழ வைக்க இணையத்தில் இம்மாதிரி வீடியோக்களைப் பதிவு செய்திருக்கும் நல்லவர்களை, மனதார வாழ்த்துவோம்.

மேலும் சில வீடியோக்கள் இங்கு உள்ளன.

http://youtu.be/99qxXvbJezI

http://youtu.be/xPQDhyr8HUQ

http://youtu.be/oMMpiGDpvC8

http://youtu.be/AK7WywgBtQg

http://youtu.be/vBGX42H9yv0

http://youtu.be/t7Hvm9e-ES4

சனி, 10 செப்டம்பர், 2011

அழைப்பதில்தான் எத்தனை புதுமைகள்!

இது இன்று கிடைத்த ஒரு அழைப்பிதழ்,

உறவினர் ஒருவரின் பேத்திக்கு ஆயுஷ் ஹோமமாம்! ஒரு பக்கம் சம்ப்ரதாயமான தமிழ் அழைப்பு! மறுபக்கம் இப்படி வித்யாசமான அழைப்பு! இங்கு ஸ்கானர் இல்லாததால் என்னுடைய மொபைலில் அதைப் பிடித்து இட்டுள்ளேன். எதையும் வித்யாசமாக, மற்றவர்கள் மனம் கவரும் வகையில் செய்ய வேண்டும் என்ற ஆர்வம் அதிகரித்து வருவது மகிழ்ச்சியாகவே உள்ளது. அதுவும் பட்டிக்காட்டில் 1980களில் வடிவமைத்த பத்திரிகைகளை விட்டு மாறாமல் அப்படியே பின்பற்றி வரும் அடியோங்களைப் போன்றவர்களுக்கு இவர்களைப் போன்றவர்களின் கற்பனை வியக்க வைக்கிறது.

வெள்ளி, 9 செப்டம்பர், 2011

இரயிலில் தொலைத்தால் இணையத்தில் கிடைக்குமாம்--- “புதிய தலைமுறை” சொல்கிறது.

நன்றி: புதிய தலைமுறை இதழ் செப்டம்பர் 15, 2011

தென்னக ரயில்வேயின் சென்னைக் கோட்டமும் ரயில்வே பாதுகாப்புப் படை காவல்துறையினரும் இணைந்து தென்னக ரயில்வே கோட்டத்தின் பிரத்யேக இணைய தளத்தில் இரயிலில் தொலைந்து போன பொருட்களைத் திரும்பப் பெற கூடுதல் சேவை ஒன்றை அறிமுகப் படுத்தியுள்ளனர்.

இந்த சேவை மூலம் ரயில் அல்லது ரயில் நிலையத்தில் தவற விட்ட தங்களது உடைமைகளை இணையதளத்தில் அடையாளம் கண்டு மீட்டுக் கொள்ளலாம். இந்தச் சேவையினை அறிமுகப் படுத்திப் பேசிய சென்னை ரயில்வே கோட்ட மேலாளர் எஸ். ஆனந்தராமன், “ரயில் மற்றும் ரயில் நிலையங்களில் கண்டெடுக்கப் படும் பொருட்களின் வரவு தொடர்ச்சியாக உள்ளது. இவ்வாறு கண்டெடுக்கப்பட்ட பொருட்கள் சென்னை சென்ட்ரல் மற்றும் எழும்பூர் ரயில் நிலையப் பாதுகாப்பு அறைகளில் வைக்கப் படும். அவைகளை உரியவர்கள் தங்கள் அடையாளங்களைச் சொல்லி மீட்டுக் கொள்ளலாம். இவ்வாறு சேர்ந்த பொருட்கள் ஒரு வாரம் அங்கிருக்கும். பிறகு, காணாமல் போன பொருட்களுக்கான அலுவலகத்திற்கு அனுப்பப்பட்டு பொருட்களின் தன்மைக்கேற்ப 90 நாட்கள் வரை பாதுகாக்கப் படும். இந்தச் செயல்களை எளிமைப் படுத்தும் வகையில் இப்போது கூடுதல் வசதியாக இணைய சேவையும் அறிமுகப் படுத்தப் பட்டுள்ளது. இதன்படி குறிப்பிட்ட புதிய இணைய முகவரிக்குச் சென்று அங்கே உள்ள விவரங்களை சரிபார்த்து உங்களது உடைமைகளை மீட்டுக் கொள்ளலாம்” என்றார்.

இந்தப் புதிய இணையப் பக்கத்தில் பொருட்கள் கண்டெடுக்கப்பட்ட தேதி, தொடர்வண்டி எண் அல்லது ஸ்டேஷன் பெயர், மேலும் கண்டெடுக்கப்பட்டது என்ன பொருள், அது யாரிடம் ஒப்படைக்கப் பட்டுள்ளது போன்ற தகவல்கள் இருக்கும். அவற்றைச் சரிபார்த்து உங்களது அடையாளங்களைச் சொல்லி பொருட்களை மீட்டுச் செல்லலாம்.

செய்யவேண்டியவை:-

www.sr.indianrailways.gov.in என்கிற இணையப் பக்கத்திற்குச் சென்று about Sr/Department/Security/ Chennai Division என்கிற சுட்டியை தட்டவும். பிறகு,

view section content என்கிற சுட்டியைச் சொடுக்கவும்.

இப்போது, Recovery of unclaimed articles by RPF என்ற சுட்டி தோன்றும். இதையும் சொடுக்கினால்,

Recovered Articles Detail (PDF) தோன்றும். (இது ஒரு டாக்குமெண்ட் பக்கம். இதைப் பார்க்க கணிணியில் ஃளாஷ் ரீடர் அவசியம்) இப்போது உங்களின் தவறிய பொருட்களை அடையாளம் கண்டு திரும்பப் பெறலாம்.

புதன், 17 ஆகஸ்ட், 2011

தேரழுந்தூர் திசைமுகனே யனையவர்கள்

தேரழுந்தூரில் வாழ்ந்த ஸ்ரீவைஷ்ணவர்களைப் பற்றிக் குறிப்பிடும்போது , திருமங்கையாழ்வார்
"செந்தமிழும் வடகலையும் திகழ்ந்த நாவர்
திசைமுகனே யனையவர்கள் செம்மை மிக்க
அந்தணர் தமாகுதியின் புகையார் செல்வத்
தணியழுந்தூர் நின்றுகந்த வமரர் கோவே."
என்றருளிச் செய்வதற்கு, "இந்த அந்தணர்கள் உபயவேதாந்த ஸேவையாலும், அர்த்த க்ரஹணத்தாலும் உபய வேதாந்த ஞான விசிஷ்டர்களாக விளங்கிக்கொண்டு ஔபாஸந அக்னி ஹோத்ராதிகளையும், அநுஸ்யூதமாய் அனுஷ்டித்து வந்தார்களென்றும், அந்த ஞானாநுஷ்டானங்களால் திருவுள்ளமுகந்து தேவாதி தேவனாகிய ஆமருவிப் பெருமாள், இவ்விதம் ஞானாநுஷ்டானங்களால் அலங்கரிக்கப் பெற்ற அழுந்தூரில் நித்யவாஸம் செய்கிறானென்று அருளிச் செய்கிறார்" ,(ஸ்ரீ என்.ஆர். க்ருஷ்ணஸ்வாமி அய்யங்கார், ஸ்வாமி தேசிகன் 7வது நூற்றாண்டு மலரில் எழுதியதிலிருந்து) என்று வ்யாக்யானங்களைப் படிக்கும்போது என்னதான் முயன்றாலும், அந்த அக்ரஹாரம் ஆழ்வார் நாளிலே எப்படி இருந்திருக்கும் என்று நம்மால் பூரணமாகக் கற்பனை செய்து பார்க்க இயலாது. அதிலும் இப்போது 60 வயதைக் கடந்த அடியேன் போன்றவர்களுக்குத் தெரிந்த அக்ரஹாரங்கள், இன்றைய தலைமுறைக்குத் தெரியப் போவதேயில்லை. அதனால் அக்ரஹாரம் என்றால் அதில் வாழ்ந்தவர்கள் எப்படி இருந்திருப்பார்கள் என்பதெல்லாம் அவர்களுக்கு விளங்கவே போவதில்லை. ஆழ்வார் கண்ட திசைமுனை -- ப்ரம்மனை -- ஒத்த தமிழிலும், சமஸ்க்ருதத்திலும் வல்லவர்களாய்த் திகழ்ந்த அந்தணர்கள் , ---- செம்மை மிக்கவாம் ஆசார சீலர்களாம் , ஸ்ரீவைஷ்ணவர்களாம் --- இப்படி இருந்திருப்பார்கள் என்று காட்ட, பல பக்கங்களில் எழுதிப் புரியவைக்க முடியாததை மிக எளிதாகப் புரிய வைக்க, இதோ ஒரு பழைய படம். அதில் இதைப் படிப்பவர்களின் குடும்பத்துப் பெரியவர்கள் கூட யாராவது இருக்கலாம்.

Photo courtesy:--
Sri Rajagopalan swamy, the illustrious son of Pudukkottai swamy Sri A. Srinivasa Ragavachariar, author of many scholarly books.

இந்தப் படத்தை நன்றாகப் பார்க்க,

http://www.flickr.com/photos/thiruthiru/6053632968/in/photostream

வியாழன், 30 ஜூன், 2011

A Happy news for the visitors!

Be Happy! There will be no updates atleast for 10 days !

திங்கள், 13 ஜூன், 2011

நம்மாழ்வார்

இன்று நம்மாழ்வார் அவதரித்த திருநாள். உலகமெல்லாம் அவரைக் கொண்டாடி மகிழ்கின்ற நன்னாள். அப்படி உலகெலாம், லக்ஷோபலக்ஷம் பேர்களை அவர் அனுக்ரஹிக்க வேண்டியிருப்பதால், அவரை இந்தத் திருப்புல்லாணியிலாவது கஷ்டப் படுத்த வேண்டாமென்று இங்கு ஒரு விசேஷமும் நடக்கவில்லை. அவரை ஏகாந்தமாக அவர் சந்நிதியிலே, திருக்கதவைக்கூடத் திறக்காமல் , அவரை சிரமப்படுத்தாமல் இருந்துவிட்டோம். அவரோ எப்போதும் ஸ்ரீமந் நாராயணனுடன் நித்யவாசம் செய்பவர், எனவே இன்று ஒரு நாள் ஏன் மங்களாசாசனம் ! அதுவும் வேண்டாம் என்று இருந்து விட்டோம். அவரை எங்கள் பக்கம் திருப்பாமல் இருந்தமையால் உலகின் மற்ற எல்லா பகுதிகளிலும் அவரை நன்றாக அனுபவித்திருப்பார்கள், அவரது திவ்ய கடாக்ஷத்திற்கு பாத்திரமாயிருப்பார்கள் என்ற எங்கள் நல்லெண்ணத்தை பாராட்டுவீர்கள்தானே?

சனி, 14 மே, 2011

அன்றும் நேற்றும் ! நாளை எப்படியோ?

எப்போ பார்த்தாலும் பெருமாள் இல்லைன்னா பழைய தமிழ் புத்தகம் காபி இதுதானே உன் ப்ளாக்கில் இருக்கிறது! என்னைப் போன்ற 65 வயது இளையர்களுக்குப் பிடித்த மாதிரி எதுவும் எழுதக்கூடாதா? என அடியேனுக்கு முன் அமர்ந்திருந்த பெரியவர் கேட்டார். சரி! ஏதேனும் போடுகிறேன் என்று சொல்லி அனுப்பி விட்டேன். நினைவுக்கு வந்தவர் நடிகர் வடிவேலு. ஏதேனும் சொல்லிவிட்டு மாட்டிக் கொள்வாரில்லையா அதுபோல நம் கதை ஆயிற்றே என்ற திகைப்பால் அவர் நினைவு வந்தது. அவரைப் பற்றி நினைவுக்கு வந்ததும், சினிமாவில்தான் எசகுபிசகாக ஏதேனும் செய்து அடி வாங்குவார், இப்போது நிஜத்திலும் அப்படி ஆகி விட்டதே என நினேத்துக் கொண்டே இணையத்தில் நுழைந்தேன். யாரோ ஒரு மகானுபாவர் எனக்காகவே இட்ட மாதிரி "மின்தமிழ்" குழுமத்தில் இந்த வீடியோவை இட்டிருந்தார். அப்பாடி வழக்கம்போல் காபி அடிக்க தோதாகிவிட்டது என மகிழ்ந்து இங்கும் பகிர்ந்து கொள்கிறேன். வீடியோவைப் பாருங்கள்!

http://www.youtube.com/watch?v=YmTSayCcBWo

செவ்வாய், 26 ஏப்ரல், 2011

திருவல்லிக்கேணி குதிரை வாகனப் புறப்பாடு

இந்த பத்து நாள்களாக அடியேன் பெரிதும் பிரமித்துப் போய் நிற்கிறேன். அடிக்கடி மற்றவர்கள் சொல்லிக் கேட்டதுண்டு “திருவல்லிக்கேணி உத்ஸவம் பிரமாதமாக இருக்கும் என்று”. ஆனால் இதுவரை ஒரு உற்சவத்தையும் அடியேன் கண்டதில்லை. இந்த வருடம் (அலுவலகத்தில் கழுத்தைப் பிடித்து வெளியே தள்ளிவிட்டதால்) அம்மாவுடன் சில நாட்கள் இருக்கலாம் என வந்த இடத்தில் பார்த்தசாரதிப் பெருமாள் ப்ரும்மோத்ஸவம் காணும் வாய்ப்பினால் ஏற்பட்ட பிரமிப்பு அது. அன்று கருட ஸேவையில் ஏற்பட்ட பிரமிப்பே இன்னும் மாறாத நிலையில் இன்று குதிரை வாகன கோலாகலம் கண்டு ஏற்பட்ட அனுபவம் சொல்ல முடியாதது. குழந்தையும் தெய்வமும் கொண்டாடும் இடத்தில் என்பதற்கு திருவல்லிக்கேணி ஒரு நல்ல உதாரணம். பெருமாள் புறப்பாடு கண்டருள்கின்ற திருவீதிகளிலே, சர் புர் என்று பாய்கின்ற வாகனங்களை அலட்சியம் செய்து 6 வயதிலிருந்து 80 வயது வரை பெண்கள் ஆசையுடன் கோலமிடுகிற அழகு என்ன! எங்கள் பார்த்தசாரதியை ஏளப் பண்ணுகிறோமென்ற பெருமிதத்தால் எவ்வளவு பெரிய வாகனத்தையும் அதில் எத்தனை பட்டர்கள் ஏறி நின்றாலும் அனாயாசமாக உற்சாக நடை போட்டு ஸ்ரீபாதம்தாங்கிகள் ஏளப் பண்ணுகிற சிறப்பு என்ன! முன்னால் ப்ரபந்த கோஷ்டியும் சரி, பின்னால் வேத பாராயணக்காரர்களும் சரி அவர்கள் பாராயணம் செய்வதை நிச்சயம் பார்த்தசாரதி திருச்செவி சாற்றுகிறான் என்ற நம்பிக்கையோடு முழு அர்ப்பணிப்போடு செய்யும் அந்த கைங்கர்யம்! அர்ச்சக பரிசாரகர்களுக்கோ ஓய்வு என்பதே இருக்கமுடியாது என்றாலும் வெகு சந்தோஷமாக அவர்கள் செய்கின்ற கைங்கர்யங்கள் எல்லாமே இந்தப் பாமரனுக்கு பிரமிப்போ பிரமிப்பு.

இன்றைய குதிரை வாகன ஏசலையும் வீடியோவாக பதிந்துள்ளேன். வெளிச்சம் போதுமானதாக இல்லை என்பதால் வெகு சுமாராக இருக்கும். அதுபோக திடீர் திடீரென்று யாராவது ஒரு கோவில் கைங்கர்யபரர் படம் எடுப்பதற்குத் தடை சொல்வார். மறுபடியும் வேறு யாராவது எடுக்க ஆரம்பித்த பிறகு எடுக்க வேண்டி வந்ததாலும், இரவு நேரத்தில் கூட்டத்தில் தள்ளுமுள்ளுகளிடையே எடுக்க நேரிட்டதாலும் சில நேரங்களில் பெருமாளுக்கு பதிலாக காமிரா எங்காவது பார்த்துக் கொண்டிருக்கும். பொறுத்துக் கொள்ள வேண்டுகிறேன். ஒவ்வொரு லிங்காகப் பார்த்தால் திருவல்லிக்கேணியில் முகாமிட்டிருந்த ஸ்ரீமத் அழகியசிங்கர்கள் இருவரும் பார்த்தசாரதிப் பெருமாளை மங்களாசாசனம் செய்கின்ற பல காட்சிகளையும் காணலாம்.

சொல்ல மறந்துவிட்டேனே!
பெருமாள் புறப்பாட்டைப் பின் தொடர்ந்த சிறுவர்கள் பொம்மைப் புறப்பாட்டையும் பெரிய அழகியசிங்கர் அருகில் கொண்டு வரச்சொல்லிக் கடாக்ஷித்து சந்தோஷப்பட்டு, சாத்துப்படி பண்ணிய சிறுவனை அருகில் அழைத்துப் பாராட்டி உற்சாகப் படுத்தி அனுக்ரஹித்தாயிற்று.

குதிரை வாகனக் காட்சிகளைக் காண

http://youtu.be/AiVtiodIbnc
http://youtu.be/yUJsnEbt8ag
http://youtu.be/ATt-VjdVSrc
http://youtu.be/TgtWxnMvj3E
http://youtu.be/EWjroczzCLE
http://youtu.be/HHrASvXYfME
http://youtu.be/3rhjGn7qeVA