முகுந்த மாலை

முகுந்த மாலை இது குலசேகர ஆழ்வார் இயற்றியது என்ற அளவிலே மட்டுமே அடியேன் அறிந்திருந்தேன். அடியேனுக்குக் கிடைத்தவைகளோ பெரும்பாலும் சம்ஸ்க்ருத மூலம் அல்லது தமிழ் லிபியில் மூலம் மட்டுமே. அடியேனது சம்ஸ்ருத அறிவோ 0 to the power of infinity என்பது அனேகமாக இந்த வலையைத் தொடர்பவர்கள் எல்லாருமே அறிந்ததுதான். அதனால் கிடைத்த அந்த நூல்களெல்லாம் அடியேனது “இம்சை” இல்லாமல் நிம்மதியாக இருந்தன.  இதற்கிடையில், பங்களூரு ஸுஹ்ருதயர் ஒருவருக்காக '”ஸப்ததி ரத்ன மாலிகா” வியாக்யானங்கள் வந்த பழைய இதழ்களைத் தேட வேண்டி வந்தது. அப்போது சில வருடங்களுக்கு முன் ஸ்ரீ அன்பில் ஸ்ரீநிவாசன் ஸ்வாமி டெல்லியிலிருந்து அனுப்பி வைத்திருந்த சில நூறு புத்தகங்களில் அடியேன் பார்வையில் இது வரை படாமல் ஒளிந்திருந்த “முகுந்த மாலை” தமிழ் அர்த்தங்களுடன் இருக்கக் கண்டேன். மிக மிக மோசமான நிலையில் இருந்த அந்தப் புத்தகம் 1937ல் ஸ்ரீ பார்த்தசாரதி அய்யங்கார் (காஞ்சிபுரம்) என்பவரால் எழுதப் பட்டிருக்கிறது. தமிழ் “அறிந்த” அனைவரும் மிகவும் மதிக்கும் ஸ்ரீ கோபாலய்யரின் மாணாக்கர் என்று பெருமையுடன் தன்னை இவர் சொல்லிக் கொள்கிறார். (அனேகமாக அந்தக் காலத்து அறிஞர்களெல்லாரும் தங்களை இன்னார் மாணவர் என்று சொல்லிக் கொள்வதில் பெருமை அடைந்திருக்கிறார்கள். சிறந்த மாணவர்களைத் தேடிச் சேர்த்த ஆசான்களும், பேரறிஞர்களான ஆசிரியர்களிடம் பல முறை அலைந்து மாணவர்களாகச் சேர்ந்து உயர்ந்ததும் அந்தக் காலம். இன்றைய நிலை --- சொல்ல வேண்டாம்). 100 பக்கங்களுக்குள் இருக்கும் அந்தச் சிறு நூல் அடியேனுக்கு முகுந்த மாலையில் ஆழ்வார் என்ன சொல்லியிருக்கிறார் என்று தெரிந்து கொள்ள வைத்த முதல் புத்தகம். நூல் இருந்த நிலையில் ஸ்கான் பண்ணுவதா வேண்டாமா என்று ஆரம்பக் குழப்பங்களுக்குப் பின், ஸ்கான் பண்ண முடிவெடுத்து ஆரம்பித்தால், முதல் அட்டையே ஒரே கருப்பாக ஆக, resolution மாற்றி மீண்டும் முயற்சிப்போம் என்று ஸ்கானர் மூடியைத் திறந்தால், தூள்களுக்கு நடுவில் கொஞ்சம் அட்டை இருந்தது. அதன்பின் மிக மிக…………………..மிக எச்சரிக்கையாக, ஒவ்வொரு பக்கமாக ஸ்கான் செய்து, சுமார் 10 மணி நேரம் செலவழித்து,  இந்த 91 பக்க நூலை ஒரு வழியாக சேமித்தாயிற்று. 600 dpi resolutionக்குக் குறைந்தால் சரியாக வரவில்லை. அதன்பின் சைஸைக் குறைத்தால் தெளிவில்லை. எனவே 100 mbக்கும் மேல் ஆகிவிட்டதால் மூன்று பகுதிகளாகப் பிரித்து சேமித்திருக்கிறேன்.

நங்கநல்லூராரே! சுயபுராணம் ஓவர்.

அடியேன் போன்றே சம்ஸ்க்ருதம் அறியாதவர்களுக்கும் உபயோகப் படலாம் என்பதற்காக  MediaFire ல்

http://www.mediafire.com/?og1xwgj23qre8

என்ற போல்டரில் மூன்று கோப்புகளாக இந்நூல் உள்ளது. விரும்புகிறவர்கள் தரவிறக்கிக் கொள்ளலாம்.

திருப்புல்லாணியில் ஸ்ரீதேசிகன் திருநக்ஷத்ரோத்ஸவ திருமஞ்சன வீடியோக்களைப் பார்க்க வேண்டும் என்று சிலர் ஆசைப்படுகிறார்கள். விரும்புகிறவர்கள் பார்க்க

திருமஞ்சனம் பகுதி 1
http://youtu.be/QlJrmEzxzWY

திருமஞ்சனம் பகுதி 2
http://youtu.be/JPTlPlHgGYg

Natteri swamy's tele -upanyasam on 3-10-2011

நாட்டேரி ஸ்வாமி போட வாரம் ஆரம்பித்த ஸ்ரீ தேசிகன் திநசர்யாவை இந்த வாரமும் தொடர்கிறார். ஆசார்யனின் தினசரி அநுஷ்டானங்களை அவர் குமாரர் நயினாராசார்யர் அற்புதமாய் எழுதியதை நாட்டேரி ஸ்வாமி நாமும் அநுபவிக்கும்படி உபந்யஸிப்பதை டவுண்லோட் செய்து கொள்ள

http://www.mediafire.com/?9qb11g6o1ururrg

சீர்பாதக்காரர்களால் பெற்ற பாக்யம்.

திருவீதிப் புறப்பாட்டுக்குத் தயாராய்!

முன்னழகும், பின்னழகும்!

ஸ்வாமி தேசிகனின் 744வது திருவவதார தினம் திருப்புல்லாணி ஸ்ரீமத் ஆண்டவன் ஆச்ரம ஸ்ரீ தேசிகன் சந்நிதியில் சென்ற வருடங்களைப் போலவே மிகச் சிறப்பாக நடைபெற்றது. காலையில் திருவீதிப் புறப்பாட்டுக்குப் பின் ஸ்வாமி தேசிகனும் அவரது ஆராத்ய மூர்த்தியான ஸ்ரீ லக்ஷ்மீ ஹயக்ரீவரும் வெகு விசேஷமான திருமஞ்சனம் கண்டருளினர். அதன்பின் நடந்த பெரிய சாத்துமுறை சமயத்தில், ஸ்ரீ ஆதிஜெகன்னாதப் பெருமாள், தாயார் அனுக்ரஹித்து அனுப்பி வைத்த மாலை, தீர்த்தம், பரிவட்டம், தளிகை ஆகியவற்றை கோவில் அதிகாரி ஸ்ரீ கண்ணன் தலைமையில் அனைத்து அர்ச்சக, பரிசாரக கைங்கர்யபரர்களும் கொணர்ந்து ஸ்ரீ தேசிகனுக்கு சமர்ப்பித்தனர். சாற்றுமுறை கோஷ்டிக்குப் பின் சுமார் 100 பேர்கள் அந்வயித்த அலங்கார ததீயாரதனம் நடந்தது. இவை பற்றியெல்லாம் சென்ற வருடங்களிலே விரிவாக எழுதி வீடியோக்களும் இணைத்துள்ளேன். அதனால் அவை பற்றி இந்த வருடமும் மீண்டும் எழுதவில்லை.

குறிப்பிட வேண்டியவை இரண்டு உண்டு. உத்ஸவங்கள் சிறக்க வேண்டுமென்றால், பாராயணம் நன்றாக இருக்க வேண்டும். அந்த வகையிலே நல்ல அதிகாரிகளான சென்னை ஸ்ரீ J.S. வாசன் ஸ்வாமியும், சென்னை ஸ்ரீ ஆராவமுதன் ஸ்வாமியும் மிக அழகாக பிரபந்த தேசிகப் பிரபந்த கைங்கர்யங்களையும், வடுவூர் பாடசாலை வித்யார்த்திகள் ராகவனும், பாலாஜியும் வேத பாராயண கைங்கர்யங்களையும் ஆத்மார்த்தமாகச் செய்து மகிழ்வித்தனர். ஸ்ரீ வாசன் ஸ்வாமிக்கு திருப்புல்லாணி பூர்வீகம். வங்கியின் மிக உயர்ந்த பதவியில் இருந்து சமீபத்தில் ஓய்வு பெற்றவர். ஸௌலப்யம் என்பதற்கு அகராதிகள் தேட வேண்டாம். அவருடன் பழகினால் போதும். அர்த்தம் புரிந்து விடும். அடியேன் மீது அளவற்ற பிரியம், திருப்புல்லாணி ஈடுபாடு இவை காரணமாக அவராகவே ஆர்வத்துடன் வந்து கலந்துகொண்டு சிறப்பிப்பது கடந்த பல வருடங்களாக வாடிக்கையான ஒன்று.

அதே போல் சென்னை நங்கநல்லூர் ரங்கராஜன் ஸ்வாமியின் கைங்கர்யங்களும் அபாரமானவை. மூன்று நாட்களும் அவர் ஆசையுடன் தேசிகனுக்குச் செய்த கைங்கர்யங்களால் உத்ஸவம் எல்லாரும் மகிழும் வண்ணம் அமைந்தது.

அடியேனை பெரும் மகிழ்ச்சிக்குள்ளாக்கிய மற்றொன்று.  அடியேன் பின்தொடரும் பல வலைப் பக்கங்களில் கண்ணன் பாட்டுக்கள் என்னை மிக மயக்கிச் சொக்க வைப்பது என்று ஏற்கனவே குறிப்பிட்டிருக்கிறேன். இந்த புல்லாணிப் பக்கங்களைத் தொடர்ந்து படிப்பவர்கள் சிலருக்கு ஞாபகமிருக்கலாம். இரண்டு மூன்று இளைஞர்களாக இணைந்து நடத்தும் அந்தத் தளத்தில் அடியேனைப் போன்று வளவள எழுத்தெல்லாம் இருக்காது. இன்றைய இளைஞர்களை எப்படிக் கவரலாம் என்பதில் அவர்கள் வித்தகர்கள். மிக கனமான சம்ப்ரதாய விஷயங்களைத் தான் அவர்கள் எழுகிறார்கள். ஆனால் அவர்கள் ஸ்டைல் காரணமாக அவர்களுக்கு ரசிகர்கள் அதிலும் 90%க்கும் மேல் இளைஞர் பட்டாளம்--ஏராளம். அந்த http://kannansongs.blogspot.com ன் ஆசிரியர்களில் ஒருவரான திரு ராகவன் எதிர்பாராமல் வந்து கலந்து கொண்டு மகிழ்வித்தார். இதுதான் அவரைச் சந்திக்கும் முதல் முறை.

காதுக்கு மிக இனிமையாக, கருத்துச் செறிவுள்ள ஸ்ரீ லக்ஷ்மீ ஹயக்ரீவ, ஸ்வாமி தேசிகன் திருமஞ்சனக் கட்டியங்களை ஸ்ரீ வாசன் ஸ்வாமி கேட்பவர் எல்லாரும் நெஞ்சு நெகிழ்ந்து பரவசமாகும் வண்ணம் அனுபவித்து ஸேவித்த ஒரு பகுதி மட்டும் இங்கு வீடியோவாக! 

சீர்பாதக் காரர்கள் என்ன செய்தார்கள்? அவர்களால் பெற்ற பாக்யம் என்ன? காலை  7மணிக்குப் புறப்பாடு என்று ஏற்பாடு. அன்று விஜயதசமி என்பதால், பெருமாள் குதிரை வாகனப் புறப்பாடும் உண்டு. தேசிகன் புறப்பாடு ஆகி, திருமஞ்சனங்கள், சாத்துபடி ஆகி பெரிய கோவில் மரியாதை வரவேண்டும். எல்லாம் கோவில் உச்சி காலத்துக்குள் – 12.30க்குள் – முடிய வேண்டும். ஆனால், ஏற்றுக் கொண்ட சீர்பாதக்காரர்கள் எங்கோ சென்று விட, 9மணி வரையும் வராத நிலையில் தாமதம் தவிர்க்க இருப்பவர்களே திருவீதிப் புறப்பாட்டுக்கு ஏளப் பண்ணுவது என்று முடிவாகி, இந்த 61 வருடங்களில், முதல் முறையாய் அந்த பாக்யம் கிடைத்தது.  கண்டிப்பாய் அடியேனின் பாவங்களில் பெரும் பகுதி கழிந்திருக்கும். இதுவும் ஆசார்யன் ஸ்ரீமத் ஆண்டவன் அனுக்ரஹமே.


அனகாபுத்தூர் (வழுத்தூர்) ரங்காச்சாரி ஸ்வாமி சமர்ப்பித்த யஜ்நோபவீதங்களுடன்

திருவீதிப் புறப்பாடு, திருமஞ்சனத்தில் சில காட்சிகள் காண

வெண்ணெய் உண்ட பெருமாயனாய் எங்கள் தேசிகன்

திருப்புல்லாணியில் நடந்து வரும் ஸ்வாமி தேசிகனின் 744வது திருநக்ஷத்ர உத்ஸவத்தின் இரண்டாம் நாளான இன்று காலையில் சாற்று முறைக்குப் பின், ஸ்ரீ லக்ஷ்மீஹயக்ரீவ, ஸ்ரீ சுதர்சன, ஸ்ரீ தனவந்த்ரி ஹோமங்கள் நடைபெற்றன.

மாலையில், ஸ்வாமி தேசிகன் வெண்ணெய் தாழி கண்ணனாக, ஸேவை ஸாதித்தார். சென்னை நங்கநல்லூர் ரங்கராஜனின் தந்தை திருப்புல்லாணி ப்ருஹஸ்பதி பாஷ்யம் அய்யங்கார் பல காலம் இந்த தேசிகன் சன்னிதியில் ஆராதகராய் சிறப்பாய் கைங்கர்யம் செய்தவர். அந்த அனுபவத்திலே, ரங்கராஜன் ஸ்வாமியும் மிகுந்த ஈடுபாட்டுடன், மிக அழகாக தேசிகனுக்கு சாத்துப்படி செய்திருந்தார். ஸ்வாமி தேசிகன் அடியேனுடைய தாத்தா நாளில் தன்னை இப்படி விதவிதமாக அனுபவிக்க வைத்து மகிழ்ந்திருந்தவர். சுமார் 75 ஆண்டுகளுக்குப் பின் இன்று எங்களையும் மகிழ்வித்தார்.

ஆச்ரம சிஷ்யர். ஒரு அற்புதமான மனிதர். அனகாபுத்தூரில் வாழ்கின்ற வழுத்தூர் ரங்காச்சாரி ஸ்வாமி. இவரைப் பற்றி ஒரு தொடர் பதிவே போடலாம். அவ்வளவு அசாதாரண குணங்கள் நிரம்பிய அபூர்வமான நல்லவர். இப்போதைக்கு சுருக்கமாக, இவர் க்ருஹம் ஒரு புத்தகக் கடல். எந்த சம்பிரதாய விஷயமான நூல் என்றாலும் விவரங்கள் இவரிடம் கிடைக்கும். விவரமென்றால், அட்டை முதல் அட்டை வரை நூலின் பெயரைச் சொன்னால் எல்லாவற்றையும் சில நொடிகளில் சொல்ல வல்லவர்.  இவர் எத்தனை புத்தகம் படித்திருக்கிறாரோ அத்தனையும் அந்த மாமியும் படித்திருக்கிறார். ஸ்ரீ ரங்கநாத பாதுகா இதழ்கள் digitalse பண்ணப் பட்டபோது, இவருடைய பங்களிப்பு மிக அதிகம். ஆரம்ப காலத்தில் வெளியான பழைய இதழ்கள் பலவற்றை எங்கெங்கோ தேடிப் பெற்றுக் கொடுத்து மகிழ்ந்தவர். இந்த ஸ்வாமி திருப்புல்லாணி ஸ்ரீ லக்ஷ்மீ ஹயக்ரீவர், தேசிகன் மூலவர் உத்ஸவர்களுக்கு வெள்ளி யஜ்நோபவீதம் செய்து கொடுத்து விட்டிருக்கிறாஃ. நாளை அவற்றை ஆசார்யர்கள் அணிந்து மகிழப் போகிறார்கள்.

 

வெண்ணெய் தாழி படங்கள் இங்கே.

 கண்ணாடியில் பின்னழகு

பின்னழகும் திருப்பாத கமலங்களும்

ஒரு சிறு வீடியோ இங்கு

தேசிகனே ! ஆடீர் ஊசல்!

இருகலையு மொருகலை யென்றாடிரூசல்
       ஈரடியு மோரடி யென்றாடிரூசல்
இருவிழியு மொருவிழி யென்றாடிரூசல்
        ஈரொளியு மோரொளி யென்றாடிரூசல்
இருவழியு மொருவழி யென்றாடிரூசல்
         ஈருலகு மோருலகென் றாடிரூசல்
பருமறையாம் திருமலையே ஆடிரூசல்
          பொறைபுனையும் பரமகுரு ஆடிரூசல்.  (ஆர்.கேசவய்யங்கார்)


திருப்புல்லாணி ஸ்ரீமத் ஆண்டவன் ஆச்ரமத்தில் திருக்குடந்தை தேசிகன் அவதார தினத்தன்று ஸ்ரீ தேசிகன் ஊஞ்சல் காட்சி.